Frisia
Frisia es un rejion costal longo la canto sude-este de la Mar Norde en lo cual es oji un parte sinifiante de Nederland, incluinte Frisia moderna e partes plu peti de Deutxland norde. Frisia es la abitada tradisional de la frisces, un popla germanica ci parla linguas frisce, relatada a engles e scotes en la familia de linguas anglo-frisce.
Frisia es comun divideda entre tre partes:
- Frisia ueste en Nederland, incluinte:
- la provinse de Fryslan
- la provinse de Groningen
- partes norde de la provinse de Holland norde, istorial Friesland ueste
- Frisia este en Sachsen, Deutxland, incluinte:
- Frisia este en la sinifia magra:
- la distrito Aurich
- la distrito Emden
- la distrito Leer
- la distrito Wittmund
- Frisia este en la sinifia vasta:
- la distrito Friesland
- la distrito Wilhelmshaven
- la munisipa Saterland
- la penisola Butjadingen, Rustringen istorial
- la munisipa Wurster Nordseekuste, Land Wursten istorial
- Frisia este en la sinifia magra:
- Frisia norde en Schleswig-Holstein, Deutxland, incluinte:
- Heligoland
- la distrito Nordfriesland
Frisia ia cambia dramosa tra tempo, par deluvias e par un cambia en identia. Lo es parte de la Nordwestblock ipotesal, un rejion istorial liada par lingua e cultur.
La popla, cual ia es plu tarda conoseda como la frisi, ia comensa coloni Frisia en la sentenio 6 aec. Seguente Plinio la vea, en la eda roman, la frisces (o sua visinas prosima, la Chauci) ia abita sur terpen, colinas fabricada. Seguente otra fontes, la frisces ia vive longo un estende vasta de la costa de la Mar Norde, acc la Mar Frisce. A acel tempo, Frisia ia es composada de la provinses moderna de Fryslan e partes de Holland norde e Utrecht.
La presentia frisce en la eda medieval temprana ia es documentida de Vlanderen norde-ueste asta la estuario de la Rio Weser. Seguente la descovres arceolojial, esta frisces no ia es la frisces de la eda roman, ma la desendentes de migrantes anglo-sason de la Baia Deutx, arivante en la Migra Grande. Per la sentenio 8, frisces etnical ia ance coloni la areas costal norde de la Rio Eider su rena dansce. La linguas frisce temprana ia es parlada longo la costa sude de la Mar Norde. La rejion es a veses nomida Frisia Grande.
Autores distante pare no difere multe entre frisces e sasones. La bizantian Procopio ia descrive tre poplas abitante Britan: angles, frisces, e britones, e la autor dansce de Knutsdrapa, cual selebra Canut la grande de la sentenio 11 usante "frisces" como un sinonim de "engles". La istoriste e sosiolojiste George Homans ia mostra un caso per la domina cultural frisce de Anglia este de la sentenio 5, indicante ordinas de proprias distinguida en carucates, distribuis de partal eritada areas comun tenida par familias, con un resiste a seniorisme feudal e otra instituidas. Alga fontes de Anglia este nomi la abitantes de la costa de la continente warnis, en loca de frisces.
En la sentenios 7 e 8, cronolojias franco nota la paises basa norde como la rena de la frisces. Seguente lejendas medieval, esta rena es composada de la provinses costal de Nederland, de la Rio Scheldt a la Rio Wester e an plu este. Rexerca arceolojial no confirma esta idea, car la renas peti ala pare ia es peti e no durante.
La arcivos frisce la plu temprana nomida 4 clases sosial, la ethelinges (nobiles) e frilinges, ci con lunlotra composa la "frisces libre" ci pote litiga a corte, e la laten , con la sclavos, ci ia es asorbeda en la laten car sclavia ia "evapora" en esta periodo. La laten ia es tenintes de tera cual los no pote posese se mesma, e es a veses liada a lo en la modo de serfos. En tempos plu tarda, los pote compra sua libria.
La rena frisce en la sentenio 7, su re Aldegisel e re Redbad, ia ave sua sentro de potia en la site de Utrecht.La leges tradisional de la frisces ia es documentida en la Lex Frisionum en la sentenio 8 tarda. Lo ia fini en 734 a la Batalia de la Boarn, cuando la frisces ia es vinseda par la francos, ci alora vinseda la parte ueste asta la Lauwers. Armadas franco ia concista la area este de la Lauwers en 785, pos cuando Carlo la grande ia defeta la xef sason Wikukind. La carolanes ia pone Frisia su la rena de un grewan, un titulo relatada a un conte, con la sinifia de "governor" en loca de "renor feudal".
En la sentenios 7 a 10, mercatores e capitanes ia ave un rol importante en la comersia internasional en benes lusosa, fundinte distritos comersial en sites distante como Sigtuna, Hedeby, Ribe, York, London, Duisburg, Cologne, Mainz, e Worms.
La areas costal frisce ia es partal ocupada par vicinges dansce en la desenio de 840, asta estas ia es espulsada entre 885 e 920. Lo ia es sujestada ce la vicinges no ia concista Frisia, ma coloni en un modo pasosa en alga distritos, como la isolas de Walcheren e Wieringen, do los ia construi fortreses simple e ia coopera e intercambia con la frisces nativa. Un de sua xefes ia es Rorik de Dorestad.
En la sentenio 12, nobiles frisce e la site de Groningen ia funda la Alia Upstalsboom su la slogan "Libria Frisce", per oposa tendes a feudalisme. La alia ia es composada de Frisia (moderna), Groningen, Frisia este, Harlingerland, Jever, e Rustringen. La distritos frisce en Frisia ueste, ueste de la Zuiderzee, no ia partisipa; ance no la distritos norde de la Rio Eider longo la costa de la Mar Norde dansce (Schlegwig-Holstein). La prima ia es controlada par la conte de Holland en 1289, e la seguente ia es governada par la duxe de Schleswig e la re de Danmarc. La mesma pertine a la distrito de Land Wuesten este de la Rio Weser. La alia Upstalsboon ia es reviveda en la sentenio 14 temprana, ma lo ia colasa pos 1337. Per acel tempo, la site nonfrisce de Groningen ia prende la controla de la distritos costal autonom.
La sentenio 15 ia inclui la mori de republicisme frisce. En Frisia este, un nobil de la familia Cirksena ia defeta sua competores con la aida de la alia Hansa. En 1464, el ia ateni la titulo de conte de Frisia este. La re de Danmarc ia susede en controla la distritos costal norde de la Rio Eider. La provinses nederlandes de Fryslan e Groningen ia resta autonom asta 1498. Per esta tempo, Fryslan ia es concistada par duxe Albert de Sachsen-Meissen. La site de Gronigen, cual ia comensa domina la distritos campanial, sede a la conte Edzard de Frisia este en 1506. La site ia dona sua vantajes restante a la Impero Habsburg en 1536. La distrito de Butjadingen (a ante Rustringen) ia es prendeda par la conte de Oldenburg en 1514, e la Land Wursten par la prinse-bispo de Bremen en 1525.
En la sentenio 16 temprana, la pirata Pier Gerlofs Donia, conoseda como Grutte Pier ("Petro la grande") ia defia la autoria de Sachsen en un gera de gerilia, suportada par la duxe de Gelders. El ia ave alga susedes e ia es temeda par autorias de Holland, ma es ia mori como un cultivor en 1520. Seguente lejendas, el ia es 2 metres de altia. Un sculta de el par Anne Woudwijk ia es erijeda en Kimswert en 1985.
En la desenio de 1560, multe frisces ia alia se con la revolui conduida par Willem de Orania contra la monarcia de la Habsburges. En 1577, la provinse de Fryslan ia deveni un parte de la nasente Republica de Nederland, e sua representores ia suscrive a la Uni de Utrecht. La site de Groningen ia es concistada par la nederlandes en 1863. De alora, la parteni en la Republica de Nederland ia es persepida como un garantia per la conserva de librias sivil. Ma la potia vera ia es usurpada par la clase alta de imobilores. Protestas contra rena aristocrata ia condui a un promove democrata en la desenio de 1780.
En la sentenios 18 tarda e 20 temprana, "Libria Frisce" ia deveni la slogan denova de frisces de un promove rejional en Frisia, esijente per diretos egal per la lingua e cultur frisce en Nederland. Ma jeneral, la istoria resente de la frisces es vera la istoria de Nederland e la otra rejiones en cual la frisces abita.