Zainab binti Jahsy
Galat skrip: tidak ada modul tersebut "Infobox Wikidata".
Zainab binti Jahsy bin Ri`ab bin Ya'mur al-Asadiyyah (bhâsa Arab: زينب بنت جحش بن رئاب الأسدية) otabâ lebbi èkennal mènangka Zainab binti Jahsy (lahèr è taon 33 sabelluna kenabbhiyân/590 M) sèdhâ è Madinah taon 20 H/641 M) èngghi panèka sapopo sareng rajina Nabbhi Muhammad, bân tamaso' Ummul Mu'minin. Zainab sareng Nabbhi èpakabin Allah è langngè' kapètto'.[1]
Kalowarga
[beccè' | beccè' sombher]- Ramana: Jahsyi bin Ri`ab bin Yu'ammar bin Shabrah bin Kabir bin Ghanam bin Dudan bin Asad bin Khuzaimah bin Mudrikah bin Ilyas bin Mudhar bin Nizar bin Ma'ad bin Adnan. Jahsyi èngghi panèka sekutuna Quraisy, Abdul Muthalib.[2]
- Èbhuna: Umaimah binti Abdul Muthalib bin Hasyim bin Abdu Manaf bin Qushay bin Kilab bin Murrah bin Ka'ab bin Lu`ay bin Ghalib bin Fihr bin Malik bin an-Nadhar bin Kinanah bin Khuzaimah bin Mudrikah bin Ilyas bin Mudhar bin Nizar bin Ma'ad bin Adnan. Umaimah èngghi panèka bhibbhi'na Nabbhi Muhammad.[2]
Zainab èngghi panèka ḍâri Bani Asad bin Khuzaimah al-Mudhari, kompoyya Abdul Mutthalib bin Hisyam.[3] Zainab ngaghungè dhulur asmana Abdullan bin Jahsy, sareng Abu Ahmad bin Jahsy. Zainab jhughân ngaghungè dhulur binè' asmana Hamnah binti Jahsy sè aropa'aghi ḍâ'-aḍâ' maso' Islam.[1]
Kaoḍi'ân bân kabinna
[beccè' | beccè' sombher]Zainab binti Jahsy èngghi panèka sapopona Nabbhi Muhammad bân dhimin ampon dhâddhi rajina potra kala’ânna Rasulullah Saw. sè asmana Zaid bin Haritsah sè pas laju apèsa.[4]
Aisyah, raji sè palèng èkasokanè Nabbhi Muhammad adhâbu jhâ’ Zainab ngaghungè karaddhinan sè paḍâ sareng Aisyah.[5]
Zainab binti Jahsy èngghi panèka sèttong orèng binè’ moljâ ḍâri kompolanna orèng tèngghi (bangsawan) sè jhughân sapopona Rasulullah Muhammad Saw sè èpèlè dhâddhi sala sèttong rajina mènangka parèntana Allah Swt.[3]
Namong sobung orèng oning jhâ’ sabâb amantana cè’ dramatissâ amarghâ parlo nyambi potra kala’ânna Rasulullah èngghi panèka Zaid bin Haritsah sè benni laèn panèka toman dhâddhi rajina Zainab binti Jahsy. Sabeb parkara panèka èsebbhutaghi jhâ' kabina Zainab binti Jahsy sareng rosulullah palèng rammè è antarana kabina Rasulullah sareng raji sè laèn, tapè kabhingongan ka'dissa ampon è jâwâb kalabân toronna wahyu ḍâri ghustè Allah.[3]
Apa bisa èbhenderaghi status kabina Rasulullah sè araji mantan rajina potra kala’ânna dhibi’? Bân parkara ka’dissa bisa ma meddhâl partokaran è antarana kaom munafik jughân orèng-orèng sè bâjhi’ ḍâ’ Rasulullah dhâddhi sajân bâjhi’ benni sajân ollè hidâyâh? Torè areng-sareng kaulâ bân panjennengan mèkkèr
Kabina Zainab kalabân Zaid
[beccè' | beccè' sombher]Parènta ḍâri Allah
[beccè' | beccè' sombher]Carèta ka’dinto amolaè ḍâri Rasulullah Muhammad mènta abhâkalan Zainab ka’angghuy potra kala'ânna Nabbhi Muhammad sè asmana Zaid bin Haritsah bin Syurahil bin Ka'ab al-Kalbi, kabulâ sè palèng èkanèserrè sè ampon èmardhika’aghi bân èangghep potra ḍâri ghi’ kènè’.[3] Mènnagka aba angka’ sè pèlak, tantona Rasulullah terro sè palèng bhâghus ka’angghuy Zaid. Maskè statussâ Zaid coma toman dhâddhi kabulâ (budak). Sa'amponna ḍâpa’ ḍâ’ dhâlemma Zainab kalabân neat ngabina Zainab ka’angghuy Zaid, ghi’ bâḍâ parbhidhâ’ân pèkkèran antarana kaduwâna. Ta’ ènyana, Zainab toman ta’ narèma lamaran ka’dissa. Sa’èngghâ Allah Swt. matoron wâhyu al-Qur’an surah Al-Ahzab ayât 36:
وَمَا كَانَ لِمُؤْمِنٍ وَلا مُؤْمِنَةٍ إِذَا قَضَى اللَّهُ وَرَسُولُهُ أَمْرًا أَنْ يَكُونَ لَهُمُ الْخِيَرَةُ مِنْ أَمْرِهِمْ وَمَنْ يَعْصِ اللَّهَ وَرَسُولَهُ فَقَدْ ضَلَّ ضَلالا مُبِينًا
Artèna: “Bân ongghu ta’ patot ḍâ’ orèng lakè’ mu’min bân jhughân ta’ patot ḍâ’ orèng binè’ mu’min, nalèkana Allah bân Rasulullah ampon nettepaghi sèttong katebtebbhân, bhâkal bâḍâ è abâ’na ka’dissa orèng pèlèan sè laèn è ḍâlem parkara kaoḍi’ânna. Bân ḍâ’ orèng-orèng sè ta’ atoro’ ḍâ’ parènatana Allah bân Rasulullah, ongghu orèng ka’dissa ampon bhingong (tersesat) kalabân kabhingongan sè nyata.”.[6]
Sabeb toronna ayât
[beccè' | beccè' sombher]Ka’angghuy ajhâbhâraghi sabeb toronna ayât panèka, adhâsar ḍâri kètab Tafsèr al-Azhar karanganna Buya Hamka sè mondhut riwayât dâri Qatadah bân Ibnu Abbas sè adhâbu jhâ’ sabeb toronna ayât panèka amarghâ Rasulullah Saw. mènta Zainab binti Jahsy, potrè ḍâri trètan binè’na abana. Asalla Zainab nyangka jhâ’ Nabbhi Muhammad mènta abâ’na Zainab ka’angghuy èkaraji Nabbhi Muhammad dhibi’. Tapè, saámponna èdhâbu’aghi sareng Nabbhi Muhammad jhâ’ èntar mènta Zainab ghâbây potra kala’ânna sè asmana Zaid bin Haritsah, sèttong kabulâ sè ampon èmardhika’aghi bân ampon èangghep akanta potra dhibi’ sareng Nabbhi Muhammad Saw. Ḍâri ghi’ jhâman jâhiliyâh, Zainab mator jhâ’ ta’ kasokan. Pas laju toron ayât panèka. Nalèkana mèrengaghi ayât panèka sè èmaos sareng Nabbi Muhammad, Zainab pan nondu’ bân kasokan ka’angghuy akabin sareng Zaid.
Ḍâri ka’dinto ampon èkaonèngè bhâktèna Ummul Mu’minin Zainab binti Jahsy. Maskè ta’ kasokan ḍâ’ lamaran ka’dissa, tape Zainab teptep narèma kalabân nèat ato’at ḍâ’ ka parèntana Allah Swt. bân akhèrra narèma Zaid mènangka sè bhâkal dhâddhi rakana. Namong, carèna oḍi’ bân kabina Zainab kalabân Zaid cè’ nèspana, mènangka sa’amponna kaduwâna akabin, kalowargana ta’ akor bân ta’ bhunga mènangka Zainab ghi’ ta’ bisa narèma katantoan ghâpanèka. Sa’èngghâ Zaid bân Zainab akhèrra apèsa.[3]
Zainab apèsa kalabân Zaid
[beccè' | beccè' sombher]Zainab ta' toman loppa jhâ' abâ'na panèka ḍâri katoronan orèng moljâ sè ta' toman dhâddhi kabulâ bân ta' toman ngaghungè ngen-angen jhâ' bhâkal dhâddhi rajina orèng lakè' sè dhimin perna dhâddhi kabulâ. Zaid ta' toman èkasokanè sareng Zainab amarghâ Zainab akabin sareng Zaid mènangka coma pakonan ḍâri Ghustè Allah. Sa'èngghâ Zaid pan-snapan kalè mator ḍâ' ka kanjeng Nabbhi Muhammad ka'angghuy nellak Zainab binti Jahsy, tapè Rasulullah coma adhâbu sopajâ Zaid sabbhâr bân ta' nellak Zainab,[3] sampè' akhèrra toron ayât al-Qur'an suroh al-Ahzab:
وَاِذْ تَقُوْلُ لِلَّذِيْٓ اَنْعَمَ اللّٰهُ عَلَيْهِ وَاَنْعَمْتَ عَلَيْهِ اَمْسِكْ عَلَيْكَ زَوْجَكَ وَاتَّقِ اللّٰهَ وَتُخْفِيْ فِيْ نَفْسِكَ مَا اللّٰهُ مُبْدِيْهِ وَتَخْشَى النَّاسَۚ وَاللّٰهُ اَحَقُّ اَنْ تَخْشٰىهُ ۗ فَلَمَّا قَضٰى زَيْدٌ مِّنْهَا وَطَرًاۗ زَوَّجْنٰكَهَا لِكَيْ لَا يَكُوْنَ عَلَى الْمُؤْمِنِيْنَ حَرَجٌ فِيْٓ اَزْوَاجِ اَدْعِيَاۤىِٕهِمْ اِذَا قَضَوْا مِنْهُنَّ وَطَرًاۗ وَكَانَ اَمْرُ اللّٰهِ مَفْعُوْلًا
"(ènga'è) nalèkana abâ'na (Muhammad) adhâbu ḍâ' ka orèng sè ampon èparèngè kanè'madhân sareng Allah bân abâ'na (jhughân) ampon aparèng nèkmat ḍâ' ka'dissa orèng "Pagghun jâgâ binina abâ'na bân tako'a bâ'na ka Allah," anapon abâ'na Muhammad mangètek è ḍâlem atèna parkara sè ampon èdhâbu'aghi sareng Allah, bân abâ'na tako' ḍâ' ka manossa samastèna kodhu tako' ḍâ' Allah. Nalèkana Zaid ampon nellak rajina, Allah makabin abâ'na kalabân ka'dissa orèng binè' (Zainab) sopajâ è antara orèng mu'min ta' berrâ' polè ka'angghuy akabin sareng rajina potra kala'ânna sa'amponna lastarè malastarè kaparlowan kalabân rajina. bân parkara sè ampon èpastè'aghi saareng Ghustè Allah panèka pagghun dhâddhi".[6]
Ḍhâsar ḍâri parèntana panèka mènangka megghâ' hak-hak potra kala'an sè è bâkto ghâpanèka ampon biyasa è masyarakat (akadhi potra asli), Sa'ènghâ Nabbhi makon Zaid ka'angghuy ta' nellak Zainab polana tako' angghebbhân rèng-orèng, yâktèna sè kodhu èkatako'è panèka coma Ghustè Allah.[3] È ḍâlem riwayât sè laèn è dhâbu'aghi jhâ Nabbhi Muhammad benni tako' tapè todus ḍâ' oca'na orèng munafik bân Yahudi sè ngoca'en jhâ' Nabbhi Muhammad ngabin bekkas rajina potrana sa'amponna Rasulullah ampon nyegghâ orèng moslèm ka'angghuy ngabin bekkas rajina potrana.[3]
Kabina Zainab kalabân Nabbhi Muhammad
[beccè' | beccè' sombher]Sa'amponna bâkto iddâh Zainab ampon lastarè, Nabbhi Muhammad makon Zaid ka'angghuy mèyos ḍâ' ka ḍhâlemma Zainab maḍâpa' dhâbu ḍâri Rasulullah jhâ' Rasulullah Saw akarep ka'angghuy adhâddhiaghi Zainab mènangka rajina. È bâkto Zaid ḍâpa' bân adhâbu pangarebbhâ Rasulullah, Zainab pas adhâbu, "kaulâ ta' bhâkal alako sèttong parkara sabellunna nyo'on èdhi ḍâ' ka Ghustè Allah".[3]
Zainab laju èkaraji sareng Rasulullah Saw., sampè' bâḍâ hadits sè èriwayâtaghi sareng Tsabit ḍâri Anas sè adhâbu jhâ' Rasulullah ta' toman mabâḍâ walimah (acara salameddhân kabin) è bâkto ngabin rajina sè laèn akadhi walimah sè èpabâḍâ è bâkto ngabin Zainab binti Jahsy. Zainab èkabin sareng Nabbhi Muhammad è taon 5 Hijriyâh è bâkto omor 35 taon. Asma aslina panèka Barrah pas laju èobâ sareng Nabbhi Muhammad dhâddhi Zainab.[3]
È ḍâlem kètab hadits Shahihain ḍâri hadits Zainab binti Abu Salamah, potra kabellunna Nabbhi Muhammad, abâ'na adhâbu, "asmana kaulâ Barrah, pas Rosulullah ngobâ dhâddhi Zainab. Zainab binti Jahsy malebbhet ka kennenganna Zainab binti Abu Salamah bân adhâbu jhâ' asmana jhughân Barrah, pas Nabbhi Muhammad aparèng asma anyar èngghi panèka Zainab".[3]
Rajina Nabbhi Muhammad sè palèng lambhâ'
[beccè' | beccè' sombher]Èdhâbuághi jhâ' Zainab èngghi panèka rajina Nabbhi Muhammad sè palèng lambhâ'. Maskè Aisyah cè' paddhângnga tambhuruwân ḍâ' ka Zainab, tapè Aisyah adhâbu jhâ' Zainab binti Jahsy panèka rajina Nabbhi Muhammad sè bhâghus aghâmana, tèngkana, jhujhur ḍâlem adhâbu, lèbur along-polong bân kalowarga, tako' ḍâ' ka Allah, bân lèbur asadâka. Ummu Salamah jhughân adhâbu jhâ' Rasulullah segghut nyebbhut asmana Zainab mènangka orèng binè' sè sholèha, segghut abhâjâng malem, lèbur apasa, bân lèbur arèng-parèng ḍâ' ka orèng mèskèn.[3]
Èdhâbu'aghi sareng Sayyidah Aisyah è ḍâlem sèttong riwayât jhâ' Nabbhi Muhammad ampon adhâbu ḍâ' ka sakabbhina rajina jhâ' rajina sè bhâkal nyosol (sèdhâ) ka'aḍâ' salastarèna kaulâ èngghi panèka sè palèng lanjhâng tanangnga. Akhèrra rajina Nabbh Muhammad salèng ngokor bân terro onènga pasèra sè palèng lanjhâng tanangnga, èngghi panèka Sayyidah Saudah. Tapè sa'amponna Zainab sèdhâ pas èkaonèngè jhâ' sè èmaksod sareng Nabbhi Muhammad èngghi panèka sè palèng lèbur asadâka amarghâ Zainab raji sè awwâl sèdhâ sa'amponna Nabbhi Muhammad sèdhâ bân Zainab lèbur asadâka.[3]
Aisyah adhâbu è bâkto mèreng kabhâr sèdhâna Zainab binti Jahsy, "Ampon sèdhâ orèng binè' sè moljâ, lèbur èbâdâ, bân lèbur nolongè na'-kana' yâtèm bân randhâ."[3]
Sombher
[beccè' | beccè' sombher]- ↑ 1,0 1,1 Syaikh Mahmud Al-Mishri. Biografi 35 Shahabiyah Nabi Muhammad. Jakarta Timur: Ummul Qura. Maret 2023. ISBN 9786027637306.
- ↑ 2,0 2,1 Ibn Hisyam. Sirah Ibnu Hisyam. 2005
- ↑ 3,00 3,01 3,02 3,03 3,04 3,05 3,06 3,07 3,08 3,09 3,10 3,11 3,12 3,13 Abdurrahman, Aisyah. (2018). Biografi Istri dan Putri Nabi. Sukoharjo: Ummul Qura.
- ↑ Al-Tabari. The History of Al-Tabari, vol.8 - The Victory of Islam. hlm. 2. È aksès tangghâl 2024-10-28.
- ↑ "Sahih al-Bukhari 4141 - Military Expeditions led by the Prophet (pbuh) (Al-Maghaazi) - كتاب المغازى - Sayings and Teachings of Prophet Muhammad (صلى الله عليه و سلم)". sunnah.com. Èaksès tangghâl 2024-10-28.
- ↑ 6,0 6,1 Al-Qur'an Al-Karim. qurankemenag.go.id
