Hafanana

Ny hafanana, amin' ny fiteny andavanandro, dia toetran' ny zavatra iray izay miseho amin' ny alalan' ny mari-pana ambony (raha ampitahaina amin' ny vatan' olombelona) sy ny fahatsapana vokatry ny fifampikasohana amin' ny zaka hafa manana io toetra io. Ao amin' ny termôdinamika (fizika) kosa, ny hafanana dia ny angovo ara-pana mifindra avy amin' ny lamina termôdinamika iray mankamin' ny lamina termôdinamika iray hafa noho ny fahasamihafan' ny mari-pana. Amin' ny fitenenana mahazatra, ny hafanana indraindray dia manondro ny angovo ara-pana. Ny angovo ara-pana dia angovo ara-kalaky avy amin' ny atôma mihararetra sy mifandona amin' ny zavatra iray.

Ny famindrana hafanana dia fizorana ahitana lamina mihoatra ny iray, fa tsy toetran' ny lamina tokana. Ao amin' ny termôdinamika, ny angovo nafindra amin' ny endrika hafanana dia manampy amin' ny fiovan' ny fiasan' ny toetran' angovo anatiny na ny entalpian' ilay lamina. Ny "hafanana" amin' ny fiteny tsotra kosa dia heverina ho fananan' ny lamina mitoka-monina.

Ny habetsaky ny angovo nafindra amin' ny endrika hafanana ao anatin' ny fizorana iray dia ny habetsaky ny angovo nafindra ivelan' ny lahasa termôdinamika natao sy ny angovo rehetra voatazona ao anatin' ilay zaka nafindra. Mba hahazoana famaritana mazava tsara ny hafanana dia tsy maintsy mitranga amin' ny lalana tsy misy fifindran-jaka izany.

Ny habetsaky ny angovo nafindra amin' ny endrika hafanana dia azo refesina amin' ny alalan' ny fiantraikany amin' ny toetry ny zaka mifandray. Ohatra, ny fifindran' ny hafanana dia azo refesina amin' ny alalan' ny habetsahan' ny ranomandry miempo, na amin' ny fiovan' ny mari-panan' ny zaka iray ao amin' ny manodidina ny lamina. Ireo fomba fiasa ireo dia ampahany amin' ny fandrefy hafana.

Ny eva mahazatra ampiasaina hanehoana ny habetsahan' ny hafanana nafindra amin' ny fizorana termôdinamika dia ny Q. Amin' ny maha habetsahana angovo nafindra azy, ny venty SI ho an' ny hafanana dia ny joule (J).