Manu

De Manu (Sanskrit: मनु, Manu m. „Mentsch“) isch im Hinduismus de ersti Mentsch und Gsetzgeber.

De Manu isch de Soo vom Vivasvat und de Brüeder vom Yama, wo as erste gstoorben isch. Drum isch de Yama de Gott vo de Verstoorbene, wääred de Manu di lebige Mentsche repräsentiert. De Manu isch au de ersti Gsetzgeber gsii, wo s Zämelebe vo de Mentsche greglet hett. De Yama aber isch de Tooterichter. De Manu isch vom Fisch Matsya, emene Avatar vom Vishnu, vor de Sintfluet grettet wore.

E Soo vom Manu isch de Ikshvaku, de Bigründer vo de Sunedynastii. Em Manu sini Töchter Ida oder Ila het de Budha (de Planet Merkur) ghüroote und baid sind d Stammeltere vo de Moodynastii.

Do d Germaane e göttliche Urmensch Mannus chenet, isch es guet mögli, as d Vorstelig vomene Urmentsch Manus us de urindoeuropäischi Religioo stammt.

di 14 Manu

Im jüngere Hinduismus sind 14 verschidnigi Manu underschide wore, und jede herrscht öber e Periode vo aim manvarta, da sind 4'320'000 Joor. De jetzig Manu isch de Manu Vaivasvata, de Soo vom Vivasvat. Er isch de sibet Manu. I Zuekumpft chömet denn no sibe witteri Manu.

1. Svayambhuva Manu
2. Svarochisa Manu
3. Auttami Manu
4. Tamasa Manu
5. Raivata Manu
6. Chakshusa Manu
7. Vaivasvata Manu
8. Savarna Manu
9. Dakshasavarna Manu
10. Brahmasavarna Manu
11. Dharmasavarna Manu
12. Rudrasavarna Manu
13. Rauchya Manu
14. Bhautya Manu

Büecher

Hans Wilhelm Haussig (Hg.): Götter und Mythen des Indischen Subkontinents. Stuttgart: Klett-Cotta (1984). ISBN 3-12-909850-X